À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs,d’écrivains et de tous ceux qui jettent leur âme sur le papier, et qui mettent en mots des réflexions profondes.

Ki mo ete devan sa bann rapas, sa bann rekin

Ki fi’nn mars lor mo destin

Ki mo ete lor sa bato ki pe fer fezer

So degenn, so grander

Fer mwa per

Ki mo ete dan sa lakal bezer

Enn lor lot, kot vag pe frakas mo kot

Nodvaer pa ti sinser

Li fi’nn briz boukou rev

Boukou leker fi’nn tom dan so piez

Lor dilo, li ale, li napa get deryer

Mo lagorz ti sere, trangle ar douler

Dan enn lindiferans li kontign so vwayaz

Lor enn larout nwaye ar soufrans

Kot nou lafwa pa ti ena okenn linportans

Ki mo ete ?

Devan sa bann lekor ki fi’nn zete

Devan sa bann lisien ki fi’nn brile

Devan sa bann fami ki fi’nn brize

Ki mo ete

Pou sa bann renar ki pe danse

Lor enn baz kot mo lakaz nepli ekziste

Kot mo later pe abrit enn bann zarm ki danzere

Kot lane apre lane

Mo lespwar fi’nn disipe

Kot lete inn vinn enn marenwar

Kot liver pe fer vantar

Kot bann serpan ankor pe fer granwar

Kot isi bann gran palto pe rod fer miliar

Ki mo ete isi an exil

Dan sa paradi ki pena tre mo zil

Kot mo enn zilwa san lavwa

Kot kan mo reklam mo draw

Se matrak ek prizon ki fer lalwa

Ki mo ete zordi?

Enn Morisien?

Enn Sagosien?

Enn Britanik?

Ou enn viktim 3 milion liv?

Ki mo ete mwa?

Bio

Geraldine Baptiste

Slameuse au nom de scène Ge-NYX, cette habitante de RocheBois aime écrire des textes sur des sujets tranchants. Ce texte parle sur la crise identitaire à laquelle les Chagossiens et les descendants chagossiens font face. Certains n’arrivent toujours pas à comprendre leur statut dans la société mauricienne. De plus, beaucoup de Mauriciens ne sont pas au courant de leurs souffrances et des injustices qu’ils subissent dans la vie de tous les jours. C’est aussi un hommage à ces dames de fer qui ont osé élever leurs voix pour faire valoir leurs droits de retour.