À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

“Eski to la?” ti garson-la dir,

Letan li tap lor laport dibwa

Sa vie lakaz anba pie lila;

“Eski to la?” li dir ankor enn fwa,

Me lor miray, dan fon lakour,

Zis enn leko ki reponn.

Pli lwin lor lari Magon,

Enn loto pase, answit enn lot,

Me apre, enn gran silans repran.

Li atann; Lor pie enn brans bouze,

Li get lao, li trouv enn zwazo,

Enn korbo ki pe sakouy so plim.

“Twa sa?” ti garson-la dir. “Pa dir mwa!”

E li get ankor vie lakaz-la,

Sa vie lakaz anba pie lila.

“Si to pa konn koze, fer enn ti tapaz,

Fer zwazo-la sove, ale

Lerla mwa kone to existe!”

Kouma li dir sa, kitsoz lor lakaz bouze!

So leker akselere… galoupe;

Pou lekou li rod sove,

Me enn ti lavwa dir li:

“Si to fer sa, zot tou pou riy twa!”

E li kontign res kot li ete;

Tigit par tigit, so lizie

Abitie ar lobskirite

E li trouv enn sat lor bardo;

Sat-la get li, apre li get zwazo,

Sa gro korbo ki lor pie lila.

“Eski to la?” li tap laport ankor enn fwa,

Me lor miray, dan fon lakour,

Zis enn leko ki reponn.

“Alors touni minwi, to kraz sek?

Normal! To pa existe, non?”

Li sakouy so latet enn fwa, de fwa.

“Asterla ki kouran finn retabli,

To disparet, to nepli revini,

Me zot dir ki to finn bare isi!”

Lerla li kas enn gran riye,

Ki leko nek zis retourne.

“Kapav kwar! Monper,

Swami, Imam,

Koz lor radio pou dir ki le mal exist

E ki pou li ale, bizin priye!

Me mwa mo dir ki le mal,

Li exist selma dan nou sa…

Pou li ale, nou ki bizin sanze!”

E li tap lor laport ankor pli for,

“Eski to la?” li kriy ankor,

Me lor miray, dan fon lakour,

Zis enn leko ki reponn.

Deor enn jip pase,

Ki fer enn gran lekar,

Pou li kontourn trotwar;

Anba kot Trou-Fanfaron

Li tann son premie kamion;

Pli pre, lor larout Nicolay,

Li tann enn lisien abwaye,

Me apre, enn gran silans repran…

Kinz lane finn pase,

Partou finn bien sanze,

Zis beton ou trouve,

Selma enn vie lakaz reste:

Enn vie lakaz dibwa,

Anba enn pie lila.

Me parfwa kan garson-la pase,

(Zordi linn gran, li finn marye)

Li tann ankor enn korbo lor pie

Ki riye dan enn lavwa kase;

E lor miray, dan fon lakour,

Zis enn leko ki reponn.

Bio

Jean Lindsay Dhookit

Ex-chargé de cours en informatique à l’université de Maurice, il a été collaborateur à «l’express», et a écrit une trentaine de nouvelles en anglais, français et «Kreol» pour la Collection Maurice (Immedia). Son premier livre, «Stepping into the Computer World», est sorti en 1992 et a été suivi une dizaine d’années plus tard par «L’informatique racontée à ma nièce». Son roman «He came from Chagos» a été publié par le «President’s Fund for Creative Writing» en 2014. Il a été lauréat du prix littéraire Jean-Fanchette en 2015 pour sa pièce de théâtre «Cette Brûlante envie de servir», qui a été jouée à Paris en 2018. En 2021, pour le «Konkour lekrtitir text siantifik» an «Kreol Morisien», il a reçu le premier prix pour son manuel «Anou fer enn teleskop». En 2023, il a remporté le Prix de poésie Edouard Maunick pour son poème «Demin pa pou twa».