À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Splandid kouman li, ena enn sel

Omilie losean li pa tousel

Li dous e limem mo dimiel

Mo leker linn tise kouman sak tres lalwes,

ki alez ek elir so lalir Rodrigez

Kouman enn tablo ki partaz tou enn zistwar

Mo zil ranpli avek rev, bizin zis krwar

Si mo zis al dan so zistes

La zistis se so zestir li res for

E li res dir, li restor so fierte ki li fer shir

Enn sinplisite ki nou nepli bizin dekrir ,

Wi mo enn Rodrigez ki bien fier

Mo patrimwann, mo kiltir, zil Rodrig mo later.

Pintire akec plizir kouler, diversite so kiltir sovan fer so loner

Reflet sak gout laswer lor enn visaz

Ankre dan nou laser, inspir bann seki pe transpir kouraz.

Kares mo lapo sapo lapay

Apiy so reyon lor sak montagn,

Donn mwan sa ti ler fre lakanpagn

Ki li dan lamer ou dan later li fer ki sa bann frer ek ser

Persevere ek perse dan seki zot pe fer.

Enn sinplisite ki nou nepli bizin dekrir ,

Wi mo enn Rodrigez ki bien fier

Mo patrimwann, mo kiltir, zil Rodrig mo later.

Ki li dan spor ou bien dan lar, mo zil pou li briye, pa bizin li dan nwar.

So kiltir akonpagne, so zariko rouz ek so diri may,

Kares mo pale, rezonn dan mo karay

Bann Rodrige, Rodrigez, ki sak sourir reyonn sak paz, sapit sirpriz

Ki mo sir priz,

Mo patri so prodiz.

Enn sinplisite ki nou nepli bizin dekrir,

Oui mo enn Rodrigez ki bien fier

Mo patrimwann, mo kiltir, zil Rodrig mo later.

Bio

Julianick Casimir

Originaire de l’île Rodrigues, elle aborde des thèmes variés allant de l’injustice sociale aux rêves des jeunes de sa génération. Du haut de ses 17 ans, elle a intégré la Rodrigues S’kool of Art en 2020 et brille déjà sur la scène du slam. À son actif : le premier prix d’«Un Incroyable Talent» à Rodrigues, une participation au «Spotlight Talent Show» à Maurice en 2020, et une nomination pour le prix au «Tann Grofi Artists Award» en 2021.